O COETFG reinvindica o papel da Enxeñaría Forestal na sociedade actual

O pasado 08 de maio, o COETFG convidado pola Escola Politécnica Superior de Lugo, participou na Xornada “A túa vocación está na terra: o teu futuro na Enxeñaría Agrícola e Forestal”, un encontro que reuniu en varias mesas temáticas a antigos alumnos e alumnas, equipo docente e representantes dos distintos colexios profesionais.

Tras a apertura oficial do Presidente da Deputación Provincial de Lugo, D. José Tome Roca, a xornada deu comezo cunha primeira mesa formada por persoas egresadas da escola, que permitiu dar visibilidade a distintas traxectorias e experiencias profesionais, deixando enriba da mesa as múltiples oportunidades e saídas que estas Enxeñarías ofrecen, tanto no eido público como privado.

Pola súa parte, o profesorado que conformaba a segunda mesa, expuxo a composición dos plans de estudos que abordan áreas de coñecemento esenciais para o desenvolvemento destas enxeñarías nas súas diferentes facetas, así como as capacidades que o alumnado debe adquirir no seu paso pola escola para exercer posteriormente a profesión.

Debateuse ademais sobre as particularidades, necesidades e retos destas profesións e da súa adaptación ás novas tecnoloxías, ao cambio climático e á necesidade social de camiñar cara o desenvolvemento sostible, cuestións que precisan de profesionais competentes capaces de adaptarse ás necesidades do mercado e da sociedade en xeral.

Xa nun terceiro bloque, os colexios profesionais, ademais de expoñer o requisito legal da colexiación en Galicia para contar coa correspondente habilitación profesional e poder exercer estas profesións, deron as súa visión sobre a situación dos distintos ámbitos profesionais e as necesidades de constante adaptación.

A intervención do COETFG, ademais de dar a coñecer os requisitos da colexiación e da precolexiación, defendeu o valor dos servizos que o noso colexio ofrece, destacando:

• Defensa da profesión e representación das mesmas ante administracións e sociedade

• Servizos dirixidos ás persoas colexiadas e precolexiadas: seguro de responsabilidade civil profesional, asesoramento xurídico, asesoramento laboral e fiscal, orientación técnica, servizo informativo, servizo de emprego, formación, convenios con administracións públicas e entidades privadas, quenda de actuación profesional, ......

• Servizos á sociedade: defensa das persoas usuarias, información sobre a profesión, punto de contacto con profesionais e empresas,...

Así mesmo salientou o amplo abano de competencias e saídas profesionais que a Enxeñaría Forestal ten na actualidade, destacando ademais o papel esencial ligado á seguridade e a saúde das persoas na actualidade, xa que o noso papel é completamente circular, comeza na natureza, está presente nas nosas vidas a través dos materiais e utensilios, sendo esencial ademais na súa recircularización.

Como peche da mesa o COETFG reivindicou o valor dos colexios profesionais como ferramenta de constante apoio e acompañamentos das e dos profesionais, sexa cal sexa o seu ámbito laboral, entendendo que independentemente da obrigatoriedade legal da colexiación, o valor real dos colexios é servir de axuda para o desenvolvemento profesional de todas e todos os profesionais exercentes ou en busca de emprego.

Como conclusión final da xornada, a Directora da EPSE de Lugo, Dª Rosa Romero Franco, deixou claro que as Enxeñarías Agrícola e Forestal representan titulacións estratéxicas e esenciais para o presente e o futuro da sociedade actual, que están en constante actualización e que no seu día a día implantan as últimas tecnoloxías ofrecendo aos mercados, profesionais de alto valor e recoñecemento.

PROGRAMA